سلام يا جماعة

طبعا بما إني قاعدة بالبيت وما وراي شي ، طلبت مني أختي العزيزة أدرس ابنها انجليزي لأنو عندو امتحان وهيه عندها شغل

وبما إني ما وراي شي فلازم أوافق (بالغصب يعني) وطبعا كان يوم ميعلم بيه إلا ربنا، هالولد طلع عيني تخيلو 3 ساعات بس بشرحلو

past simple +present simple+present simple with verb to be

طبعا ما بدهم شي وبتزكر عأيامي كنت باخدهم بالابتدائي وكنت بدرس لحالي وبحفظ وبفهم وبمتحن كمان لحالي ، بس جيل هالأيام تخصص برفع الضغط وتوتير الأعصاب وحرق الدم ، والله الله يعين اختي كيف متحملة ابنها وبتدرسو كل يوم أنا بزماناتي كنت بدرس لحالي هلأ هو قد الشحط ولازم حد يدرسو ، وطول الوقت يا أسومه ركز معي يا أسامة مش حعيد تاني يا أسامه دخيل الله صوتي راح يا أسامة رح أضربك لو ضليت تتشاقى

طبعا طول الوقت بيلعب وبيحكي وبينط من مكان لمكان (جن) والمصيبة اني بس اسألو سؤال بيرد وبيجاوبني صح

كيف ما بعرف؟؟

بتعرفو هالنوع من الأولاد الي بيكون مشاغب وشاطر لدرجة إنو بيصدمك هو هاد أسامة العفريت

بس جد زمان ما كانت امي ولا ابوي يهتلو هم دراستنا أنا واخواني

وكنا ندرس لحالنا من واحنا صغار وما نيجي لامي نسالها إلا لو في سؤال ما عرفناه أو لحتى اتسمعلنا قصيدة او سورة قرآن

وكنا بوقت الامتحانات مسؤولين عن دراستنا والي بيجيب درجة مو منيحة بيزعل مو لانو امو وابوه مخوفينو بالعكس بس لانو كنا من جوة بدنا انجيب الدرجة لإلنا مو لحد تاني

بس لاحظت هالايام باغلب الطلاب مو بس بعيلتي لا بكل الناس الي بصادفهم إنو الاولاد هيك وبطلو يهتمو وبدهم حد يدرسهم بيكون بالخامس والسادس والاعدادي والثانوي ولسة معتمدين بشكل كلي على حد ليدرسهم

والله تعب عالأهل وعالاولاد

ولا إنتو شو رايكم؟؟؟

وبالآآآآآآآآآآآآآآآخر

يا أسامة بديش أشوف وجهك مرة تانية عندي، ولو إمك طلبت مني أدرسك بدي أولع فيك وفيها

ههههههههههههههههههههههههههههههههههههههههههه

كان أتعس يوم من أيام حياتي وان شاء الله ما بينعاد (مش عارفة مين الي طلع علي هالسمعة العاطلة وقال اني بعرف أدرس)

أنا أعلنت اعتزالي يا جماعة عن تدريس الانجليزي والرياضيات

اللهم بلغت اللهم فاشهد

******************************

اليوم وأخيرا بعد 17 يوم استلمت سيارتي من الوكالة ، طبعا الاغلبية سمعو بخبر إني عملت حادث بسيارتي بعد استلامها بأسبوع من الوكالة

ونزولا على رغبة الاهل والاصحاب خليتها مخبوطة وما غسلتها شي عشر ايام قال شووووووو(خرزة زرقة) والحمدلله اجت بالسيارة وما اجت فيني الحادث كان بسيط والحمدلله

تعرفو اني فرحت بطلعت سيارتي من التصليح اكتر من فرحتي باستلامها من الوكالة اول مرة

حبيبتي يا زوبة ،يا مدلعاني يزوبة ، يمفسحاني يزوبة

وهاي زوبة لمة استلمتها من ساعتين من الكراج وكمان شوي بدي اروح اغسلها واعوضها ايام الحرمان الي عاشتهم وهية بعيد عني *_^